Mall Culture: SM and Walter Mart

Ipinahambing sa amin ang kultura ng pagmo-mall ng mga Pilipino sa pagitan ng SM Calamba at Walter Mart  Calamba.

Una naming pinuntahan at inobserbahan ang Walter Mart. Napansin ko na konti lang ang mga tao, kung titingnan ang kanilang mga kasuotan sila ay nabibilang sa middle class- lower class o gitna hanggang mababang antas ng lipunan. Mas maraming babae ang nagmo-mall kaysa sa mga lalake kung titingnan ang kabuuan ng nasabing gusali. Subalit dahil ang Walter Mart ay may Bingo, maraming kalalakihan ang nalagi din sa nasabing lugar ngunit partikular sa parte kung saan ginaganap ang Bingo. Bukod sa pamamasyal o window shopping sa loob nito, at pati na rin sa paglahok sa Bingo, napansin ko rin ang mga kabataang  laman ng mga internet shops. Sa totoo lang, masasabi kong wala gaanong namamasyal o window shopping dahil ang mga taong umiikot dito ay siguradong may bibilhin or binili. Kumbaga nakaplano ang pagpunta nila sa Walter Mart dahil mayroon silang partikular na bagay na nais bilhin o nakatakda nilang bilhin.

Sa mga tindahan naman sa loob , karamihan ay mga di kilalang tatak ng mga tindahan ng damit at sapatos ngunit kahit ganito man ang mga bilihin, mura naman at abot kaya ang mga ito. Sa kabuuan, tahimik at maluwag ang buong mall, sa tingin ko hindi masyadong patok sa mga tao ang mga negosyo sa loob nito maliban na lamang sa internet shops at Bingo.

Sa SM naman ay halos kabaligtaran ng sa Walter Mart. Di hamak na mas maraming taon sa SM at ang mga tao ay nabibilang mula sa mataas na antas hanggang sa pinakamababang antas ng lipunan. May mapapansin kang mga propesyonal tapos sa kabilang banda may makikita kang mga jejemon. Sumasaklaw ang mga tao mula sa propesyonal hanggang sa mga tipong, “tambay.”

Dahil sa pisikan na anyo mas malaki ang SM kaysa sa Walter Mart, mas marami itong mga tindahan at mga ang mga presyo ng bilihin ay mas mahal pero hindi lahat, may ilan –ilang mga tindahan na kasing-mura din ng Walter Mart katulad ng Pay Less at Surplus.  Mayroon ding mga popular na salon o  barber shop hindi katulad ng nasa Walter Mart.

Isa pang pagkakaiba na napansin ko ay may information center sa SM kung saan makakapagtanong ka ng kahit anong may kinalaman sa mall, kung may hinahanap kang tindahan, kainan, o taong iyong kasama ngunit sa Walter Mart, wala akong napansin na ganito. Napansin ko din na may elevator sa SM ngunit sa Walter Mart, wala talaga. At mas marami ang tinatawag na “play house” sa SM at ang isa pang pagkakaiba talaga ay ang breast feeding station na nakita ko, na hindi ko rin napapansin sa ibang SM sa Maynila, at mas lalong wala sa Walter Mart.

Kahit na maraming kabataan ang nagi-internet shop sa Walter Mart, mas marami pa ring mga kabataan, naka-uniporme pa, ang palakad lakad sa loob ng SM. Idagdag pa ang nasabing event dahil Women’s Day, may pagtatanghal na ginaganap kung kaya’t marami mga tao ang mga naguusisa at nanonood. Napansin ko din na maraming mga security personnel sa iba’t ibang lugar sa loob ng SM ngunit sa Walter Mart, sa pasukan lang meron gwardiya. Nakita ko rin na mas malinis ang kapaligiran sa loob ng SM kahit na puno ito ng maraming tao saka may mga bakanteng mauupuan o lugar na maaaring maging pahingahan o hintayan o kaya pag simpleng pagod ka lang sa kakalakad at kakaikot sa mall.

Sa kabuuan, masasabi ko na mahilig talaga tayong mga Pilipino na mamasyal sa mall, kahit ano pa ito, mapa-Walter Mart o SM. Isa ito sa mga libangan ng kahit sino, mapabata man o matanda. Nakakapagbigay aliw ito sa mga tao dahil una, hindi naman problema ang pagpasok dito, wala namang entrance fee o bayad. Bukod sa makakabili ka ng iyong mga nais, makakapaggugol ka pa ng oras sa iyong pamilya. Ang pagkakaiba lang sa pagitan ng SM at Walter Mart, ay ang laki at lawak ng gusali, klase ng mga tindahan, at ang bagay na may kinalaman sa seguridad at hintayan ngunit sa klase ng mga tao, halos pareho lang. Hindi maiiwasan na talagang kasama na sa kultura ng mga Pilipino ang pumunta sa mga mall, kahit ano pang araw para maglibang at makonsumo ang kanya-kanya nating pangangailangan.    

WALTER MART: 

internet shop

Bingo Bonanza

Mga kabataan halos ang nasa internet shop

Sinehan na mas mura kaysa sa mga normal na malls tulad ng SM

Mga tindahan na nagbebenta ng mura

Pagmasid sa ground floor ng Walter Mart

Kahit maliit, mayroon itong escalator

Supermarket ng Walter Mart

Pagpasok sa Walter Mart, ito ang bubungad sa iyo

Mga taong papasok sa Walter Mart

Walter Mart sa labas

SM CALAMBA:

Mga pumapasok sa SM

2 security guard na agad ang sasalubong

Information Center, wala nito sa Walter Mart

Ang dami ng tao na pumapasok at lumalabas sa SM

Women's Day, madami ang umuusisa

"hintayan"; bakanteng lugar o lounge

Iba't ibang serbisyo, tulad ng LBC na wala din sa Walter Mart

Medical Center sa loob ng SM

Pagmasid sa ibaba ng SM

Food court at iba pang mga stalls

Elevator sa SM!

At may breastfeeding station din.

Hindi na plastik, kundi papel. Save Mother Earth!

Parking space (with cover) mula sa bintana